أعيد نشر ما كتبته على الفايسبوك خلال رحلتنا حول المونت بلان سنة 2017 للذكرى و الإفادة.

الإنطلاق نحو المونت بلان

المرحلة 0:

وصلنا لليون وين كملنا آخر التحضيرات ..
أول قرار بعد السفرة من تونس لليون : باش نتخلاو على برشا حاجات باش نخففو من ميزان السيكان .. الي البارح كان مهم و باش نستحقوه ولى اليوم كونفور زايد و لازم نتخلاو عليه.

عملنا دورة هايلة في ليون و تو حاضرين انشاء الله للمغامرة .. انشاء الله الطقس يكون باهي و اكاهو. 

27 أوت 2017

المرحلة 01:

عالسلامة
مرحلة الاولى وفات بنجاح .. رقدنا مليح في الخيمة و قمنا امخر .. لازمني برشا وقت باش نحكي و نبرتاجي التصاور ..
الطقس هايل ..
ضحى البطلة في فورمة.

29 أوت 2017

المرحلة 02:

ايا سيدي نحنا في الحقيقة كملنا اليوم المرحلة 04.

اما فتناكم بالمشي .. تي بالحديث .. هاني باش نرجع للنهار الثاني : انطلقنا من رفيوج مياج في اتجاه بحيرة جوفي ..
في الثنية تعدينا بكنيون مزيان تو تشوفوه في التصاور و كملنا النهار بطلعة صعيبة للبحيرة .. طلعة و بحيرة ؟
اي البحيرة على ارتفاع 2200 متر يعني تقريبا 3 مرات قد بو قرنين ..بلاصة مزيانة برشا اما سولون ضحى “موحشة” .. نصبنا خيمتنا و بتنا على بلاصتنا .. 
ضحى اليوم بدات تسأل على الطلعات و تقارن في الصعدات و الهبطات و تحب تعرف الثنية شمزالت مخبية.

المرحلة 03:

أول ما قمت تنطرت نعمل في دورة على البحيرة و سرحت شوية نلوج على البحيرة الثانية .. بالرغم الماء بارد فما تراس متع عباد تعوم غادي .. عملت تصيورات و سلفيات و رجعت نلم في الخيمة على خاطر المطر بدات تنكت .. ايا سيدي انطلقنا .. يا معلم النهار ما اطولو.. طيبنا برغل ( قمح و صوص حمراء تي اي برغل و برة ).

في الكول دو بونوم و امبعد طلعنا للكول دي فور 2711 متر .. أعلى نقطة وصلنالها لين تو و ظاهرلي اعلى نقطة في الدورة لكل .. منينا رواحنا الي ما مازال كان لهبطة ب 1000 واش نميترو .. طلعت الهبطة اصب من الصعدة و ما حبتش توفا .. صحيح المناظر مزيانة اما المرحلة متعبة برشا .. ضحى قررت 700 نمرة باش تبطل من غدوة ..

في الاخر وصلنا لروفوج دي مووت الافان آس .. بدلنا البرنامج و قرننا باش نتعشاو و نباتو في الروفوج .. الجو كان هايل كي دخلنا بقية لي روندونور فرحو بينا.. كل واحد كيفاش مقمرنا .. الي بالساك و الي بالشابو و الي يمشيو و ياقفو و الي قتلي “قهرتوني بالقصة الي عملتوها ) .. تعشينا عشاء بنين و حكينا مع كوبل امريكان و جماعة المان ( الالمان يعملو في التور بالبساكل .. ليغ وحدة اخرى اذوكم ) .. الترتيحة رجعتلنا المورال و ضحى بطلت من التبطيل.

المرحلة 04:

تحسنا في كل شيئ .. فقنا بكري و حضرنا بكري و انطلقنا في اتجاه الحدود الإطالية عبر كول لا سانيو ..
طلعة معتبرة صباحية و امبعد ما فما كان الهبوط .. في الكول اول مرة يظهرلنا سي الجبل الأبيض (المونت بلان اعلى قمة في اوروبا ) .. بونجور تبدلت بونجورنو تو .. عملنا مجهودنا باش كملنا المرحلة بكري و صلنا لبلاصة التخييم وين كان عندنا الوقت باش ناكلو و نغسلو الحوايج و ضحى تدرجح شوية و نبرتاجي معاكم النهارات الي تعداو ..

  30 أوت 2017

المرحلة 05:

انجمو نقولو 4 بيس .. نظرا للتقلبات الجوية المرتقبة قررنا باش نرتحو في كورمايور .. مدينة مزيانة فيها كل شيء .. و كل يوم ديما فما هدايا لقينا فما انيماسيون في المدينة على خاطر فاها ترايل .. حظرنا على الانطلاق متاعو و هانا ندورو في الشوارع المزيانة .

ملي بدينا المشية عرضونا برشا عباد من مختلف الجنسيات : استراليا كندا امريكا كوريا المانيا رومانيا هولاندا و بالطبيعة الفرنسيس و الطلاين .. لكن ما فما حتى عربي ! 
المصري الوحيد الي عرضنا يخدم في رستورون في اطاليا ..
فرح كي رانا و قال عرفتكم عرب  شد صحيح باش يشربنا قهوة.
بون المقارنات مابين “شعب النملة و شعب الصرصار ” على قول ضحى ماتوفاش.

31 أوت 2017

انشاء الله عيدكم مبروك.

01 سبتمبر 2017

المرحلة 06:

كيما كنا نستناو و كيما شفتو في كورمايار الطقس تبدل 180 درجة .. مطر و سحاب و رعد.

قصدنا ربي الصباح في اتجاه الحدود السويسرية الايطالية عبر كول فرات بكسر الفاء .. الطلعة لكل كانت في وسط السحاب و المطر .. تجربة جديدة عمري ما عشتها قبل : المشي وسط السحاب .. الرؤية تمدد من 3 الى 10 أمتار هههه.
كيما برمجنا وقفنا في اول مأوى في ثنيتنا وين بتنا و عدينا الليلة.
تقريبا عدينا اكثر من 24 ساعة في وسط سحابة ممطرة .. قالولنا الي صار انهيار صخري سكر الثنية ..

المرحلة 07:

نظرا للأحوال الجوية الصعيبة في الجزء السويسري من الرحلة ماناش قاعدين نشوفو في الجبولات خاطرها مغطية بالسحاب و المطر تجبد ( فما تصويرة للانهيار الي صار و حكيتلكم عليه في المرحلة السادسة.. جسر لوح طار من بلاصتو) ، واصلنا المشي و قصرنا الثنية بالكار لين وصلنا لبلاصة مزيانة فاها بحيرة صغرونة اسمها بحيرة شامبي الفان ايكس زادة .. هانا باش نعديو الليلة غادي قبل ما نرجعو غدوة للطلوع و الجبل.
بي اس : ما تنساونيش في ليان للماتش 

02 سبتمبر 2017

المرحلة 08:

مالي خرجنا من الاوبارج عرضنا الأول في UTMB السباق الي قاعد يصير في الانحاء .. الي نعملو فيه في 10 ايام الاول يعملو في 21 ساعة اكاكة ( وانا قاعد نكتب جاتني معلومة أصح السيد الي عرضنا الصباح كمل التور في 19 ساعة ). تبارك الله عليهم.

ايا سيدي شدينا ثنيتنا كالعادة و المطر مالي دخلنا سويسرا و هي حالفة لا تسيبنا. جرت المطر تفارقت مع مظلتي .. مظلتي الي سافرت معايا و حماتني من الشمس قررت باش تاخو رتراتها في سويسرا و تركش في بلاصة موش باش يستعملها فاها حد .. ديما مغيمة ديما مطرة .. بالكشي تولي قطعة ديكور .. على كيفها ربي يوجهها خير.
اليوم وصلنا لارتفاع 2000 متر وين بدا الثلج يصب .. غررررر مالا برد . المهم وصلنا و هنا نشربو في آخر قهوة في سويسرا.

03 سبتمبر 2017

المرحلة 09:

تحسن الطقس و هانا رجعنا لفرنسا .. طلعنا في الصباح في جو بارد اما منغير مطر لين وصلنا للكول دو بالم الحدود السويسرية الفرنسية.
المنظر لفوق كان مزيان برشا .. خضار و جبل ابيض في الفون حاجة مزيانة برشا.
تو هبطنا و كملنا المرحلة نصبنا خيمتنا لليلة و هانا نعملو في قهوة

هدية اليوم من الحياة:
نلقا كتاب في قهوة روعة .. تصاور و كلمات خفاف و تاي بنين بريحة الياسمين .. رويال

البطلة فرحانة بالشمس ..

05 سبتمبر 2017 آخر يوم في رحاب المونت بلان

المرحلة 10 و الاخيرة:

ستنا الساعة ولت البارح قبل ما نتعشاو قعدنا نحكيو مع كوبل من نيوزيلاندا .. اعمارهم الزوز فوق 65 جري ..
يعملوا في التور كيفنا .. هرينا على كل شيء على الماكلة على تونس و بحوراتها و صحرتها و سيدي بوسعيدها و قرطاجها و حنبعلها و فيولتو و روما و تركيا و اتاتورك و اردوغان و لورد اوف ذو رينق و كل شيء حسيلو … 

ايا نرجعو لمرحلتنا البارح طلعنا آخر طلعة و بتنا على ارتفاع 2400 متر في البحيرة البيضاء ..
بلاصة خرافية بالنسبة ليا مقابلة الجبل الأبيض طول (محلاه التعريب متع المونت بلان). 
الصباح كانت معبية ياسر البلاصة و آخر العشية قعدو كان الصحاح.
لعبت طرح ناسيونال جيوغرافي مع شاموا ( منعرفش اسمو بالعربي غزال متع جبل ) انا نجري وراه و هوا لاهي ياكل ماحبس يبوزي  .. متعة. 

البارح كان فما غيم مغطي الجبل .. اليوم الصباح تنحا الغيم و تفرجت في طلعة الشمس على اعلى قمة في اوروبا (كان نعتبرو الي اعلى جبل في روسيا جاي في شيرة آسيا .. براف). 
صورت صورت صورت و ما شبعتش .. على فكرة التصاور أحلى على انستاغرام من الفايسبوك .. 
اليوم هلطنا و رجعنا لنقطة الانطلاق و هكا تكون الدورة وفات.
هانا نحتفلو بالماكلة البنينة.

هكذا كانت رحلتنا حول المونت بلان. إن أعجبتكم و ترغبون في خوض التجربة لا تتردوا في التفاعل معنا عبر التعاليق أو صفحة الفايسبوك.
دمتم مسافرين.
دمتم سعداء.